Job 41

1Ungambamba na uLeviyathani ngewuka loba uhitshele ulimi lwakhe ngentambo na?

2Ungawufaka umkhala yini emakhaleni akhe kumbe ubhoboze umhlathi wakhe ngewuka na?

3Uzabe elokhu ekuncenga yini ukuthi umzwele? Uzakhuluma lawe ngamazwi apholileyo yini?

4Uzakwenza isivumelwano lawe na ukuthi abe yisichaka sakho kokuphela?

5Ungamenza abe yisifuyo sokudlalisa njengenyoni na kumbe umfake umkhungo adlaliswe ngamantombazana na?

6Abathengi bazabhejelana ngentengo yakhe na? Bazakwahlukaniselana ngaye na abathengi?

7Ungasibhoboza yini isikhumba sakhe ngenhlendla loba ikhanda lakhe ngemikhonto yokuciba inhlanzi?

8Ungabeka isandla phezu kwakhe, uzahlala ukukhumbula ukutshukana kwenu ungaphindi futhi!

9Ukucabanga ukuthi ungamehlula kuyize; ukumbona nje kodwa kuqeda amandla.

10Kakho ongaba lesibindi sokuthi alwe laye. Pho ngubani ongamelana lami na?

11Ngubani engilomlandu kuye othi kangibhadale na? Konke okukhona ngaphansi kwezulu kungokwami.

12“Kangisoze ngikhawule ukubabaza izitho zakhe, amandla akhe langesimo sakhe esihle.

13Ngubani ongaxebula isikhumba sakhe na? Ngubani ongasondela kuye ngamatomu na?

14Ngubani ongaqunga isibindi avule iminyango yomlomo wakhe, ogqagqelwe zingavula zamazinyo na?

15Umhlane wakhe ulezinhlu zamahawu abophene silikici;

16yilelo lithe mba kwelinye okuthi kakungeni moya phakathi kwawo.

17Anamathelene ndawonye; abambene okokuthi angeke ehlukaniswe.

18Ukuthimula kwakhe kukhupha inhlansi zomlilo; amehlo akhe anjengemisebe yokusa.

19Amalangabi omlilo alavuza emlonyeni wakhe; izinhlansi zomlilo ziqhatsha ziphuma khona.

20Intuthu ithunqa iphuma emakhaleni akhe kungathi isuka embizeni ebilayo phezu komlilo wemihlanga.

21Ukuphefumula kwakhe kubhebhisa umlilo wamalahle, njalo kulavuka amalangabi emlonyeni wakhe.

22Amandla akhe ahlala entanyeni; okuphambi kwakhe kuhle kuphele amandla.

23Amavinqo enyama yakhe abambene nko; aqinile kawehlukaniseki.

24Isifuba sakhe silukhuni njengelitshe, siqine njengangaphansi kwembokodo.

25Uthi nxa ephakama kwesabe amaqhawe ngokwawo; atshede ebalekela ukubhula komsila wakhe.

26Inkemba leyo emfikelayo kayenzi lutho, kumbe umkhonto, loba umtshoko loba isijula.

27Insimbi uyithatha njengotshani lethusi kungathi yiluthi olubolileyo.

28Imitshoko kayimenzi abaleke; lamatshe esavutha anjengomule kuye.

29Induku kuye iyisiqa sotshani; uyahleka esizwa ukukhenceza komdikadika.

30Ingaphansi yomzimba wakhe injengezindengezi ezibukhali, itshiya umzila edakeni kungathi yisileyi esizunguzekayo.

31Udunga izinziki zamanzi ayabuke njengembiza enkulu ibila, aluvube ulwandle njengembiza yamagcobo.

32Ngemuva kwakhe utshiya umzila okhazimulayo; umuntu angazathi ulwandle luloboya obumhlophe.

33Kakukho emhlabeni okulingana laye – isidalwa esingesabiyo.

34Ubakhangelela phansi bonke abathi bazithembile; uyinkosi phezu kwabo bonke abazigqajayo.